საქართველოს ჩემპიონმა დინამო ბათუმმა თურქულ შეკრებაზე საკონტროლო მატჩი ყაზანის რუბინთან ჩაატარა. ბათუმელთა შემადგენლობაში პირველად ითამაშა ჯანო ანანიძემ, ხოლო რუბინს ორთვიანი პაუზის შემდეგ ხვიჩა კვარაცხელია დაუბრუნდა. ბელეკში გამართული სპარინგი ფრედ, ანგარიშით 2:2 დასრულდა.

ოთხივე გოლი შესვენების შემდეგ გავიდა. ბათუმელებმა ანგარიში 11-მეტრიანით გახსნეს. 58-ე წუთზე ჯაბა ჯიღაურს პირველი დარტყმა რუბინის მეკარემ აუღო, თუმცა არბიტრმა ამ უკანასკნელზე წესების დარღვევა დააფიქსირა და ჯიღაურს მეორედ დაარტყმევინა. ჯაბა ამჯერად ზუსტი აღმოჩნდა - 1:0. 


აქედან 5 წუთში პენალტი დინამო ბათუმის კარშიც დაინიშნა, რომელიც რუბინის ფეხბურთელმა ონუგხამ ზუსტად შეასრულა და ანგარიში გაათანაბრა. მალევე კუპატაძის კარში კიდევ ერთი გოლი კლიმოვმა შეაგდო - 2:1. 


საბოლოო ანგარიში ბოლო წუთზე ისევ ჯიღაურმა დააფიქსირა, რომელიც მოედნის სიღრმიდან გაკეთებული პასის შემდეგ, მეკარესთან პირისპირ გავიდა, ბურთი თავზე გადაუგდო და დუბლი გაიფორმა - 2:2.